விஜய்யின் தமிழக வெற்றி கழகம் தொடங்கி ஒரு ஆண்டு நிறைவு பெற்றதை அடுத்து, ஆண்டு விழா பொதுக்கூட்டம் நடைபெறும் இடம் தேர்வு செய்யப்பட்டு இருப்பதாக தகவல் வெளியாகியுள்ளது.

தமிழக வெற்றி கழகத்தின் முதல் ஆண்டு விழா மற்றும் பொதுக்குழு கூட்டம் மகாபலிபுரம் அருகே நடைபெற இடம் தேர்வு செய்யப்பட்டு உள்ளதாக செய்தி வெளியாகியுள்ளது. இந்த இடத்தை கட்சியின் பொதுச்செயலாளர் ஆனந்த், அரசியல் வியூக அமைப்பாளர் ஜான் ஆரோக்கியசாமி, மற்றும் தேர்தல் மேலாண்மை பொதுச் செயலாளர் ஆதவ் அர்ஜுன் தேர்வு செய்ததாக கூறப்படுகிறது.

இந்த மாதத்திற்குள் பொதுக்குழு கூட்டம் மற்றும் முதல் ஆண்டு விழா ஆகிய இரண்டையும் சேர்த்து நடத்தி முடிக்க வேண்டும் என்றும் ஏற்கனவே கட்சியின் தலைவர் விஜய் உத்தரவிட்டிருந்த நிலையில், தற்போது இடம் தேர்வு செய்யப்பட்டுள்ள தகவல் வெளியாகியுள்ளது.

முன்னதாக, நந்தனம் ஒய்.எம்.சி.ஏ மைதானத்தில் நடத்த திட்டமிட்டிருந்த நிலையில், அதற்கு அனுமதி கிடைக்காததால், தற்போது மகாபலிபுரம் அருகே தேர்வு செய்யப்பட்டு இருப்பதாக கூறப்படுகிறது. இது குறித்து கட்சியின் மூலம் அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது.