வெற்றிமாறன் தயாரித்த "பேட் கேர்ள்" என்ற திரைப்படத்தின் டீசர் சமீபத்தில் வெளியாகி பெரும் சர்ச்சையான நிலையில், இந்த படத்திற்கு தற்போது சர்வதேச விருது கிடைத்துள்ளதாக தகவல் வெளியாகியுள்ளது.

வெற்றிமாறன் மற்றும் அனுராக் காஷ்யப் இணைந்து தயாரித்த "பேட் கேர்ள்" திரைப்படத்தை வர்ஷா பரத் இயக்கியிருந்தார். இந்த படத்தில் அஞ்சலி சிவராமன், சாந்தி பிரியா, சரண்யா ரவிச்சந்திரன் உள்ளிட்ட பலர் நடித்துள்ளனர்.

இந்த படத்தின் டீசர் சமீபத்தில் வெளியான நிலையில், ஒரு டீன் ஏஜ் பெண் வாழ்க்கையை எப்படி பார்ப்பாள்? அவளுக்கு ஏற்படும் ஆசைகள், கனவுகள், இச்சைகள் என்ன? என்பதைக் காண்பிக்கும் விதமாக இருந்தது. இதுவே பெரும் சர்ச்சைக்கு காரணமாகி, ஒரு குறிப்பிட்ட பிரிவினர் கடும் கண்டனம் தெரிவித்தனர். மேலும், இந்த படத்தை திரையிட கூடாது என்று சிலர் போராட்டமும் நடத்தினர்.

இந்த நிலையில், ரோட்டர்டேம் சர்வதேச திரைப்பட விழாவில் இந்த படம் தேர்வு செய்யப்பட்டு விருதும் அளிக்கப்பட்டுள்ளது. இதனை தொடர்ந்து படக்குழுவினருக்கு பாராட்டுக்கள் குவிந்து வருகின்றன.