அஜித் நடித்த ’விடாமுயற்சி’ திரைப்படம் இன்று வெளியாகி, பாசிட்டிவ் விமர்சனங்களை பெற்று வருகிறது. திரையுலக பிரபலங்களும் இந்த படத்தை பார்த்து தங்களுடைய கருத்துக்களை பகிர்ந்து வருகின்றனர். அந்த வகையில் இயக்குனர் வெங்கட் பிரபு, ஆதிக் ரவிச்சந்திரன் ஆகியோர் இந்த படம் குறித்து தங்கள் எக்ஸ் பக்கத்தில் பகிர்ந்துள்ளனர்.

அஜித், திரிஷா நடிப்பில், மகிழ் திருமேனி இயக்கத்தில், அனிருத் இசையில், லைக்கா நிறுவனம் தயாரித்த ’விடாமுயற்சி’ உலகம் முழுவதும் பிரம்மாண்டமாக வெளியானது. இந்த படத்தின் முதல் நாள், முதல் காட்சி முடிந்த உடனே சமூக வலைதளங்களில் பாசிட்டிவ் விமர்சனங்கள் குவிந்து வருகிறது.

இந்த நிலையில், இந்த படத்தை பார்த்த பிரபல இயக்குனர் வெங்கட் பிரபு, தனது எக்ஸ் பக்கத்தில் வாழ்த்து தெரிவித்துள்ளார். அந்த பதிவில்,

"விடாமுயற்சி திரைப்படம், அதன் கதைக்கு ஏற்ப உருவாக்கப்பட்டுள்ளது. ஒரு சராசரி மனிதனாக அஜித் அவர்கள் மிக அருமையாக நடித்துள்ளார். ஆனால், அதே நேரத்தில் இந்த படத்தில் செம சர்ப்ரைஸ் ஆக அர்ஜுன் மற்றும் ரெஜினா கேரக்டர்கள் அமைந்துள்ளன. அவர்களுக்கு என்னுடைய வாழ்த்துக்கள். சூப்பர் டூப்பர் பிளாக்பஸ்டர் படம்!" என்று தெரிவித்துள்ளார்.

அதேபோல், அஜித்தின் அடுத்த படமான "குட் பேட் அக்லி" என்ற படத்தை இயக்கி வரும் ஆதிக் ரவிச்சந்திரன், தனது எக்ஸ் பக்கத்தில்,

"விடாமுயற்சி பிளாக்பஸ்டர் மாமே! அஜித் அவர்களுக்கு வாழ்த்துக்கள். அவருடைய டீமுக்கும் எனது வாழ்த்துக்கள்." என்று தெரிவித்துள்ளார்.

இந்த இரண்டு பதிவுகள் தற்போது இணையத்தில் வைரலாகி வருகின்றன.