தளபதி விஜய் தொடங்கிய தமிழக வெற்றி கழகம் அரசியல் கட்சியுடன் கூட்டணியில் இணைந்துள்ளதாக அரசியல் கட்சி ஒன்று அதிகாரப்பூர்வமாக அறிவித்துள்ளது.

கடந்த ஆண்டு நடிகர் விஜய் தமிழக வெற்றி கழகம் என்ற அரசியல் கட்சியை தொடங்கிய நிலையில், அடுத்த ஆண்டு நடைபெறவுள்ள சட்டமன்ற தேர்தலில் இந்தக் கட்சி அனைத்து தொகுதிகளிலும் போட்டியிடும் என்று கூறப்பட்டுள்ளது. மேலும், சில கட்சிகளுடன் கூட்டணி அமைக்கும் வாய்ப்பும் உள்ளது.

இந்த நிலையில், அதிமுக உள்பட சில கட்சிகளுடன் கூட்டணி பேச்சுவார்த்தை நடைபெற்று வருவதாகக் கூறப்பட்டாலும், தமிழக வெற்றி கழகத்துடன் இணைந்ததாக இதுவரை எந்த அரசியல் கட்சியும் அறிவிக்கவில்லை என்பது குறிப்பிடத்தக்கது.

இந்த சூழலில், தமிழ்நாடு முஸ்லிம் லீக் கட்சியின் நிறுவனர் முஸ்தபா, தமிழக வெற்றி கழகத்தின் பொதுச் செயலாளர் ஆனந்த் மற்றும் நிர்வாகிகளை சந்தித்து, தனது கட்சி தமிழக வெற்றி கழகத்துடன் கூட்டணியில் இணைவதாக அறிவித்துள்ளார்.

இதுகுறித்து அவர் வெளியிட்ட அறிக்கையில் கூறியிருப்பதாவது:

"மாநில மற்றும் தேசிய கட்சிகளில் கூட இஸ்லாமியர்களுக்கு உரிய அங்கீகாரம் வழங்கப்படவில்லை. சிஏஏ சட்டத்தை திரும்பப் பெற வேண்டும் என்று கோரி, இஸ்லாமியர்களின் பக்கம் நின்றவர் விஜய். தமிழக வெற்றி கழகத்தில் இஸ்லாமியர்களுக்கு உரிய அங்கீகாரம் வழங்கப்படுவதாகத் தெரிகிறது.

தமிழக வெற்றி கழகத்திற்கு எதிராக, இஸ்லாமியர்களை திசைதிருப்ப திமுக முயற்சி செய்கிறது. ஆனால், இந்த சதி எடுபடாது. வாக்கு வங்கிக்காக திமுக, சிலரின் மூலம் இஸ்லாமியர்களை திசை திருப்ப முயற்சி செய்கிறது. இதுபோன்ற அற்ப செயல்களை திமுக நிறுத்திக் கொள்ள வேண்டியது அவசியம்." என்று கூறியுள்ளார்.