இயக்குனர் சுந்தர் சி இயக்கத்தில் ஸ்ரீதேனாண்டாள் பிலிம்ஸ் நிறுவனத்தின் தயாரிப்பில் 'சங்கமித்ரா’ என்ற திரைப்படத்தின் அறிவிப்பு கடந்த 2017 ஆம் ஆண்டு வந்தது. இந்த படத்தின் பர்ஸ்ட் லுக் போஸ்டர் அந்த ஆண்டு கேன்ஸ் திரைப்பட விழாவில் வெளியானது என்பது குறிப்பிடத்தக்கது.

ஜெயம் ரவி, ஆர்யா, ஸ்ருதிஹாசன் உள்பட பலர் இந்த படத்தில் முக்கிய வேடங்களில் நடிப்பதாக இருந்த நிலையில் இந்த படம் அதன் பிறகு படப்பிடிப்பு தொடங்காமல் தாமதமாகி வந்தது என்பது குறிப்பிடத்தக்கது.

இந்த நிலையில் ஐந்து ஆண்டுகள் கழித்து தற்போது 'சங்கமித்ரா’ படத்தை தயாரிக்க லைகா நிறுவனம் முன் வந்துள்ளதாக தெரிகிறது. ’பொன்னியின் செல்வன்’ உள்பட ஒருசில வரலாற்று திரைப்படங்கள் தற்போது வெற்றி பெற்று வரும் நிலையில் 'சங்கமித்ரா’ படத்தை தயாரிக்க லைகா முடிவு செய்துள்ளது.

ஏஆர் ரகுமான் இசையில் உருவாகும் இந்த படத்தின் அதிகாரபூர்வ அறிவிப்பு இன்னும் ஓரிரு நாளில் வெளியாகும் என்று எதிர்பார்க்கப்படுகிறது. மேலும் இந்த படத்தில் இருந்து ஸ்ருதிஹாசன் விலகிவிட்டதாகவும், அவருக்கு பதில் நாயகியாக திஷா பதானி நடிக்கவிருபதாகவும் தகவல் வெளியாகியுள்ளது. திஷா பதானி ஏற்கனவே சூர்யாவின் ‘சூர்யா 42’ படத்தில் நடித்து வருகிறார் என்பது குறிப்பிடத்தக்கது.