தமிழில் பிஸியான இசையமைப்பாளராக இருக்கும் அனிருத் ஜோடியாக ஸ்ரீலீலா நடிக்க இருப்பதாகவும், இது குறித்த அறிவிப்பு விரைவில் வெளியாகும் என்றும் கூறப்படுகிறது.

தமிழ் மட்டுமின்றி தெலுங்கு, பாலிவுட் என பான் இந்திய இசையமைப்பாளராக மாறி இருக்கும் அனிருத் தற்போது ’தேவாரா’, ’வேட்டையன்’, ’விடாமுயற்சி’, ’இந்தியன் 3’, ’கூலி’, ’லவ் இன்சூரன்ஸ் கம்பெனி’, ’SK 23’ உள்ளிட்ட படங்களுக்கு இசையமைத்து வருகிறார். தளபதி விஜய் நடிக்கும் ’தளபதி 69’ படத்திற்கும் இவர்தான் இசையமைப்பாளர் என்பது குறிப்பிடத்தக்கது.

இந்த நிலையில் திரையுலகில் பிஸியான நிலையிலும், வெளிநாட்டில் இசை நிகழ்ச்சி உட்பட சில நிகழ்ச்சிகளை நடத்தி வரும் அனிருத், ஒரு ஆல்பம் பாடலை கம்போஸ் செய்துள்ளதாகவும், இந்த ஆல்பத்தில் அவரே நடிக்க இருப்பதாகவும் கூறப்படுகிறது.

இந்த ஆல்பத்தில் அனிருத்துடன் இணைந்து பிரபல தெலுங்கு நடிகை ஸ்ரீலீலா நடனமாட இருப்பதாகவும், இதற்கான பேச்சுவார்த்தை முடிந்து விட்டதாகவும் விரைவில் அறிவிப்பு வெளியாகும் என்றும் கூறப்படுகிறது.

ஏற்கனவே தமிழில் சில படங்களில் ஸ்ரீலீலா நடிப்பதாக இருந்த நிலையில், இன்னும் அவர் ஒரு தமிழ் படத்தில் கூட நடிக்கவில்லை. இந்த நிலையில், அனிருத்துடன் இணைந்து தமிழ் ஆல்பத்தில் நடிக்க இருப்பது பரபரப்பை ஏற்படுத்தி உள்ளது.