பிரபல பாலிவுட் நடிகர் சோனு சூட் மனைவி சோனாலி சூட் நேற்று இரவு கார் விபத்தில் சிக்கிய நிலையில், அவர் மருத்துவமனையில் எமர்ஜென்சி வார்டில் சிகிச்சை பெற்று வருவதாக தகவல் வெளியாகியுள்ளது.

நேற்று இரவு மும்பை-நாக்பூர் தேசிய நெடுஞ்சாலையில், சோனு சூட்டின் மனைவி சோனாலி சூட், அவரது சகோதரி மற்றும் உறவினர் ஒருவர் காரில் பயணித்துக் கொண்டிருந்தபோது, அவர்களின் கார் மீது லாரி மோதியதாக கூறப்படுகிறது. இந்த விபத்தில் சோனாலி சூட் மற்றும் அவரது சகோதரி இருவரும் படுகாயம் அடைந்துள்ளதாகவும், இன்னொரு உறவினர் லேசான காயத்துடன் உயிர் தப்பிய உள்ளதாகவும் தகவல் வெளியாகியுள்ளது.

நேற்று இரவு 10.30 மணியளவில், அவர்கள் நாக்பூரில் உள்ள தனியார் மருத்துவமனையில் சேர்க்கப்பட்டதாகவும், தற்போது எமர்ஜென்சி வார்டில் சிகிச்சை அளிக்கப்பட்டு வருவதாகவும் மருத்துவமனை அறிக்கை வெளியிட்டுள்ளது. தற்போதைய நிலையில், இருவருக்கும் காயங்கள் அதிகமாக இருந்தாலும், அவர்கள் உடல்நிலை மேம்பட்டு வருவதாகவும், அபாய கட்டத்தை தாண்டி உள்ளதாகவும் மருத்துவர்கள் தெரிவித்துள்ளனர்.

இது குறித்து, சோனு சூட் ஒரு ஊடகத்திற்கு அளித்த பேட்டியில், தனது மனைவி தற்போது நலமாக இருப்பதாகவும், கடவுளின் அருளால் அவர் உயிர் தப்பியதாகவும் தெரிவித்துள்ளார்.

இந்த நிலையில், சோனு சூட்டின் மனைவி விரைவில் குணமடைந்து வீடு திரும்ப வேண்டும் என்று அவரது ரசிகர்கள் பிரார்த்தனை செய்து வருகின்றனர்.