சிவகார்த்திகேயன் நடிப்பில், ஏ.ஆர். முருகதாஸ் இயக்கத்தில் உருவாகி வரும் படத்தின் படப்பிடிப்பு கடந்த சில மாதங்களாக நடைபெற்று வந்தது. இன்று, சிவகார்த்திகேயன் பிறந்த நாளை முன்னிட்டு, இந்த படத்தின் டைட்டில் வெளியாகும் என்று அறிவிக்கப்பட்டிருந்தது. அதன்படி, சற்று முன் இந்த டைட்டில் வெளியாகியுள்ள நிலையில், இதே டைட்டில் கடந்த 2006 ஆம் ஆண்டு ஆக்‌ஷன் கிங் அர்ஜுன் நடித்த படம் ஒன்று வெளியாகியுள்ளது என்பது குறிப்பிடத்தக்கது.

தமிழ் திரையுலகின் முன்னணி நடிகர்களில் ஒருவராக உருவான சிவகார்த்திகேயன் நடிப்பில் உருவான ’அமரன்’ திரைப்படம் மிகப்பெரிய வெற்றி பெற்றது. தற்போது, அவர் ஏ.ஆர். முருகதாஸ் இயக்கத்தில் உருவாகி வரும் படத்திலும், சுதா கொங்கரா இயக்கத்தில் உருவாகும் படத்திலும் நடித்து வருகிறார்.

சிவகார்த்திகேயன் மற்றும் சுதா கொங்கரா படத்தின் டைட்டில் ’பராசக்தி’ என்று சமீபத்தில் அறிவிக்கப்பட்டது. நடிகர் திலகம் சிவாஜி கணேசன் முதல் பட டைட்டிலை, சிவகார்த்திகேயன் தனது அடுத்த படத்துக்கு வைத்திருக்கிறார் என்றும் விமர்சனம் செய்யப்பட்டது.

இந்த நிலையில், சற்றுமுன் சிவகார்த்திகேயன் - ஏ.ஆர். முருகதாஸ் படத்தின் டைட்டில் ’மதராசி’ என வைக்கப்பட்டுள்ளது. இதே டைட்டிலில், ஆக்‌ஷன் கிங் அர்ஜுன் நடித்து, இயக்கிய ஒரு படம் 2006 ஆம் ஆண்டு வெளியானது என்பது குறிப்பிடத்தக்கது.

சிவகார்த்திகேயனுக்கு ஜோடியாக ருக்மணி வசந்த் நடிக்கும் இந்த படத்தில், துப்பாக்கி வில்லன் வித்யூத் ஜம்வால், சபீர், விக்ராந்த் உள்ளிட்ட பலர் நடித்துள்ளனர்.

அனிருத் இசையில் உருவாகி வரும் இந்த படத்தை ஸ்ரீ லட்சுமி மூவிஸ் நிறுவனம் பிரமாண்டமாக தயாரித்து வருகிறது என்பது குறிப்பிடத்தக்கது.