நடிகை குஷ்பு ஏற்கனவே அவ்னி சினிமேக்ஸ் என்ற தயாரிப்பு நிறுவனத்தை நடத்தி வருகிறார். இந்த நிறுவனத்தின் மூலம், சுந்தர்.சி இயக்கிய பல படங்களை அவர் தயாரித்துள்ளார் என்பதும் தற்போது கூட இந்நிறுவனம் ’மூக்குத்தி அம்மன் 3’, ‘கேங்க்ஸ்டர்ஸ்’ உள்ளிட்ட படங்களை தயாரித்து வருகிறது.

இந்த நிலையில், தற்போது அவர் புதிதாக "அவ்னி மூவிஸ்" என்ற பெயரில் இன்னொரு தயாரிப்பு நிறுவனத்தை தொடங்கியுள்ளார். இந்த நிறுவனம் பென்ஸ் மீடியாவுடன் இணைந்து ஒரு படத்தை தயாரிக்க இருப்பதாக அறிவிக்கப்பட்டுள்ளது.

இந்த படத்தின் பூஜை நேற்று நடந்தது. இதில் சந்தோஷ், ரேஷ்மா, வெங்கடேஷ், வினோத் கிஷன், சம்யுக்தா விஸ்வநாதன் உள்ளிட்ட பலர் நடிக்கின்றனர். அஸ்வின் கந்தசாமி என்பவர் இந்த படத்தின் மூலம் இயக்குனராக அறிமுகமாகிறார்.

இந்த படம் குறித்து இயக்குனர் கூறுகையில்: "நகைச்சுவை, ரொமான்ஸ் மற்றும் உத்வேகம் கொண்ட கற்பனை கதையாக இது இருக்கும். இரண்டு மாறுபட்ட எதார்த்தங்களை வழிநடத்தும் ஒரு கதாபாத்திரத்தை இந்த படத்தின் கதை பின்பற்றுகிறது. காமெடி மட்டுமின்றி, இதயபூர்வமான உணர்ச்சியையும் வெளிப்படுத்தும் படமாக இருக்கும். கிராமப்புறத்தில் இருந்து நகர்புறத்திற்கு மாறும் பின்னணியில் அமைந்துள்ள இப்படம், உறவுகளுக்கான புதிய, வழக்கத்துக்கு மாறான அணுகுமுறையுடன் இருக்கும்." என்று கூறினார்.