எங்கள் படத்தை கிண்டல் செய்து மீம்ஸ் பதிவு செய்தால், அவர்களை சிவன் தண்டிப்பார் என அந்த படத்தில் நடித்த நடிகர் சாபம் விட்டிருப்பது பரபரப்பை ஏற்படுத்தியுள்ளது.

பிரபல தெலுங்கு நடிகர் விஷ்ணு மஞ்சு நடிப்பில் உருவான "கண்ணப்பா" என்ற திரைப்படம் ஏப்ரல் 25ஆம் தேதி வெளியாக உள்ளது. தமிழ், தெலுங்கு, ஹிந்தி, ஆங்கிலம், கன்னடம் என பல மொழிகளில் இந்த படம் வெளியாக இருக்கும் நிலையில், படத்தின் விளம்பர பணிகள் தற்போது நடைபெற்று வருகிறது.

இந்த படத்தில் சரத்குமார், ப்ரீத்தி முகுந்தன், ராகுல் ராமகிருஷ்ணா, பிரம்மானந்தம், மோகன் பாபு உள்ளிட்டோர் நடித்துள்ளனர். மேலும், மோகன்லால், பிரபாஸ், அக்ஷய்குமார், காஜல் அகர்வால் ஆகியோர் சிறப்பு தோற்றத்திலும் நடித்துள்ளனர்.

இந்த நிலையில், படத்தின் பாடல்கள் மற்றும் கேரக்டர் போஸ்டர்கள் வெளியாகி நல்ல வரவேற்பை பெற்றுள்ளன. இருப்பினும், சிலர் இந்த படத்தை கிண்டல் செய்து மீம் பதிவு செய்து வருகின்றனர்.

இதனை அடுத்து, படத்தில் நடித்த ரகுபாபு சமீபத்தில் ஒரு ஊடகத்திற்கு பேட்டி அளித்துள்ளார். அப்போது, "எங்கள் படத்தை ட்ரோல் மற்றும் கிண்டல் செய்தால், அவர்களை சிவன் கண்டிப்பாக தண்டிப்பார், ஒருவரை கூட விடமாட்டார். சிவனின் கோபத்திற்கு ஆளாக வேண்டாம்" என்று எச்சரிக்கை விடுத்து பரபரப்பை ஏற்படுத்தியுள்ளார்.