உலகநாயகன் கமல்ஹாசன் நடிப்பில் மணிரத்னம் இயக்கத்தில் உருவாக இருக்கும் ’கமல்ஹாசன் 234’ படத்தின் படப்பிடிப்பு மற்றும் ரிலீஸ் தேதி குறித்த தகவல் தெரியவந்துள்ளது.

சமீபத்தில் கமல்ஹாசன் விருது வழங்கும் விழாவில் ’இந்த படம் ’நாயகன்’ படம் போன்று இருக்கும் என்று கூறியதை அடுத்து இந்த படத்திற்கு மிகப்பெரிய எதிர்பார்ப்பு ஏற்பட்டுள்ளது.. ரெட் ஜெயண்ட் மூவிஸ் மற்றும் மெட்ராஸ் டாக்கீஸ் இணைந்து தயாரிக்கும் இந்த படத்திற்கு ஏஆர் ரஹ்மான் இசையமைக்க உள்ளார். இந்நிலையில் இந்த படத்தின் திரைக்கதை அமைக்கும் பணி தற்போது விறுவிறுப்பாக கொடைக்கானலில் நடைபெற்று வருவதாக கூறப்படுகிறது.

இந்த நிலையில் இந்த படத்தின் நாயகி ஆக நயன்தாரா அல்லது த்ரிஷா நடிப்பார் என்று கூறப்பட்ட நிலையில் பிரபல பாலிவுட் நடிகை வித்யா பாலன் நடிக்க இருப்பதாக வெளியான செய்தியை ஏற்கனவே பார்த்தோம். இந்த நிலையில் இந்த படத்தின் படப்பிடிப்பு அடுத்த ஆண்டு தொடங்கும் என்று எதிர்பார்க்கப்படுகிறது. அடுத்த ஆண்டு பிப்ரவரி அல்லது மார்ச் மாதத்தில் இந்த படத்தின் படப்பிடிப்பு தொடங்கி அடுத்த ஆண்டு தீபாவளி அல்லது கிறிஸ்துமஸ் தினத்தில் வெளியிட திட்டமிட்டு உள்ளதாக செய்திகள் வெளியாகி உள்ளன.

இதற்கிடையில் கமல்ஹாசன் நடித்துக் கொண்டிருக்கும் ’இந்தியன் 2’ படத்தின் படப்பிடிப்பு இறுதி கட்டத்தில் உள்ளது என்பதும் இந்த படத்தை வரும் தீபாவளி அல்லது பொங்கல் தினத்தில் வெளியிட படக்குழுவினர் திட்டமிட்டுள்ளனர் என்பது குறிப்பிடத்தக்கது.