அஜித் நடித்த ’விடாமுயற்சி’ திரைப்படம் நேற்று முன்தினம் வெளியாகி, நல்ல வரவேற்பை பெற்று வருகிறது. இந்த நிலையில் இந்த படத்தின் இடைவேளையின் போது, ஜிவி பிரகாஷ் நடித்த படத்தின் ட்ரைலர் வெளியானது. இந்த டிரெய்லர் ரசிகர்கள் மத்தியில் நல்ல விமர்சனங்களை பெற்றுள்ளது.

ஜிவி பிரகாஷ் நடிப்பில் உருவாகியுள்ள திரைப்படம் ’கிங்ஸ்டன்’ என்பதும், இந்த படத்தின் படப்பிடிப்பு முடிவடைந்து தற்போது தொழில்நுட்ப பணிகள் விறுவிறுப்பாக நடைபெற்று வருகிறது என்பதும் தெரிந்தது.

ஏற்கனவே இந்த படத்தின் டீசர், கடந்த மாதம் 9ஆம் தேதி வெளியான நிலையில், தற்போது ’விடாமுயற்சி’ படத்தின் இடைவேளையின் போது திரையரங்குகளில் வெளியிடப்பட்டது. முதல் முறையாக தமிழ் சினிமாவில், முழுக்க முழுக்க கடலில் ஒரு பேண்டஸி படமாக்கப்பட்ட திரைப்படம் ’கிங்ஸ்டன்’ என்பது குறிப்பிடத்தக்கது.

ஜிவி பிரகாஷ் ஜோடியாக திவ்ய பாரதி நடித்துள்ள இந்த படத்தை கமல் பிரகாஷ் இயக்கியுள்ளார். மர்மமான முறையில் கடல் நடுவே உள்ள கப்பலில் சிக்கிக் கொள்பவர்கள், தப்பிப்பது எப்படி என்பதுதான் இந்த படத்தின் கதை என்பது டீசர் மூலம் தெரியவந்துள்ளது.

மேலும், ’விடாமுயற்சி’ படத்தை பார்த்த அஜித் ரசிகர்கள், இந்த டீசரை குறித்து தங்களது சமூக வலைதளங்களில் பாசிட்டிவ் விமர்சனங்களை பதிவு செய்து வருகின்றனர். எனவே, இந்த படத்திற்கு நல்ல எதிர்பார்ப்பு ஏற்பட்டுள்ளது.