அஜித் நடித்த "குட் பேட் அக்லி" என்ற திரைப்படம் வரும் ஏப்ரல் 10ஆம் தேதி உலகம் முழுவதும் பிரமாண்டமாக வெளியாக உள்ளது. இந்த படத்தின் முதல் சிங்கிள் பாடல் நாளை மாலை 5.05 மணிக்கு வெளியாகும் என்று அதிகாரப்பூர்வமாக அறிவிக்கப்பட்டிருந்தது.

இந்த நிலையில், இந்த பாடலின் ப்ரோமோ வீடியோ சற்று முன் வெளியிடப்பட்டது. அந்த வீடியோ தற்போது இணையத்தில் வைரல் ஆகி வருகிறது.

மொத்தம் 27 வினாடிகள் மட்டுமே கொண்ட இந்த ப்ரோமோ வீடியோவில், இசையமைப்பாளர் ஜிவி பிரகாஷ் மற்றும் இயக்குனர் ஆதிக் ரவிச்சந்திரன் ஆகிய இருவரும் இந்த பாடலை ஆவேசமாக, உச்சஸ்தாயில் பாடும் காட்சிகள் உள்ளன. விஷ்ணு எடாவன் எழுதிய இந்த பாடல், நிச்சயம் ஓஜி சம்பவம் என சொல்லப்படும் அளவுக்கு இருக்கிறது.

பாடகர்களின் தொண்டை கிழியும் வகையில், ஆவேசமாக பாடப்பட்ட இந்த 27 வினாடி வீடியோவையே பார்க்க பரவசமாக உள்ளது என்றும், முழு பாடலை பார்க்க ஆர்வத்துடன் காத்திருப்பதாக ரசிகர்கள் கமெண்ட் பதிவு செய்து வருகின்றனர்.

அஜித், த்ரிஷா, பிரசன்னா, சுனில், ராகுல் தேவ் உள்ளிட்ட பலர் நடிப்பில் உருவாகி வரும் இந்த படத்திற்கு ஜிவி பிரகாஷ் இசையமைத்து வருகிறார். அபிநந்தன் ராமானுஜம் ஒளிப்பதிவில், விஜய் வேலுக்குட்டி படத்தொகுப்பில் உருவாகி வரும் இந்த படத்தை மைத்ரி மூவி மேக்கர்ஸ் நிறுவனம் பிரமாண்டமாக தயாரித்து வருகிறது. ஆதிக் ரவிச்சந்திரன் இயக்கும் இந்த படம் 2025ஆம் ஆண்டின் மிகப்பெரிய எதிர்பார்ப்புக்குரிய படமாக உள்ளது.