ஏற்கனவே ஷங்கரின் மகள் அதிதி ஷங்கர் நடிகையாக ஜொலித்துக் கொண்டிருக்கும் நிலையில், ஷங்கரின் குடும்பத்தில் இருந்து இன்னொருவர் திரையுலகத்திற்கு அறிமுகம் ஆகி உள்ளதாகவும், அதுவும் சிவகார்த்திகேயன் படத்தில் அறிமுகமாகி உள்ளதாகவும் தகவல் வெளியாகி உள்ளது.

தமிழ் திரையுலகின் பிரம்மாண்டமான இயக்குநர் ஷங்கர், அடுத்தடுத்து வெற்றி படங்கள் கொடுத்துக் கொண்டிருந்த நிலையில், 'இந்தியன் 2’ மற்றும் ’கேம் சேஞ்சர்’ ஆகிய இரண்டு படங்கள் எதிர்பார்த்த வெற்றியை பெறவில்லை. இந்த நிலையில், அடுத்ததாக அவர் ’இந்தியன் 3’ திரைப்படத்தில் கவனம் செலுத்தி வருவதாகவும், இதனை அடுத்து ’வேள்பாரி’ என்ற படத்தை இயக்க இருப்பதாகவும் கூறப்படுகிறது.

இந்த நிலையில், ஷங்கரின் மகள் ஏற்கனவே கார்த்தி நடித்த ’விருமன்’ என்ற திரைப்படத்தில் நடிகையாக அறிமுகமானார். அதன் பின்னர், சிவகார்த்திகேயன் நடித்த ’மாவீரன்’ உள்ளிட்ட சில படங்களில் நடித்துள்ளார்.

இப்போது, ஷங்கரின் மகன் அர்ஜித், உதவி இயக்குநராக சிவகார்த்திகேயன் நடிக்கும் ;மதராசி; படத்தின் மூலம் அறிமுகம் ஆகி இருப்பதாக தகவல் வெளியாகியுள்ளது. ஏ.ஆர். முருகதாஸ் அவர்களின் உதவி இயக்குநராக அர்ஜித் பணிபுரிந்து வருவதாகவும், இதுதான் அவர் பணிபுரியும் முதல் படம் என்றும் கூறப்படுகிறது. சில படங்களில் அர்ஜித் உதவி இயக்குநராக பணிபுரிந்த பின்னர், அவர் இயக்குநராக வெளிவருவார் என்றும் தகவல் வெளியாகியுள்ளது.