தளபதி விஜய் நடித்து வரும் ‘ஜனநாயகன்’ திரைப்படத்தில் முக்கிய கதாபாத்திரத்தில் நடித்து வரும் நடிகை அடுத்ததாக நடிகர் தனுஷ் படத்தில் நாயகியாக ஒப்பந்தம் செய்யப்பட்டுள்ளதாக தகவல் வெளியாகியுள்ளது.

நடிகர் தனுஷ் தற்போது ’இட்லி கடை’ மற்றும் ’குபேரா’ ஆகிய படங்களை முடித்துவிட்டு, ஹிந்தி படத்தில் நடித்துக் கொண்டிருக்கிறார். அடுத்த கட்டமாக, அவர் மீண்டும் தமிழில் ஒரு படத்தில் நடிக்க உள்ளார். இந்தப் படத்தை வேல்ஸ் பிலிம்ஸ் இன்டர்நேஷனல் நிறுவனம் தயாரிக்க இருப்பதாகவும், மிகப்பெரிய பட்ஜெட்டில் உருவாகும் இந்த படம் ஒரு அதிரடி ஆக்சன் என்டர்டெயின்மென்ட் திரைப்படமாக இருக்கும் எனக் கூறப்படுகிறது.

’போர் தொழில்’ என்ற வெற்றி படத்தை இயக்கிய விக்னேஷ் ராஜா இந்தப் படத்தை இயக்க உள்ளதாகவும், அதன் ஆரம்பகட்ட பணிகள் விரைவில் தொடங்க இருப்பதாகவும் தகவல் வெளியாகியுள்ளது. இந்தப் படத்தில் நாயகனுக்கு சமமான முக்கியமான கதாபாத்திரம் நாயகிக்கு இருப்பதால், பிரபலமான இளம் நடிகையை நாயகியாக ஒப்பந்தம் செய்ய வேண்டும் என படக்குழு திட்டமிட்டதாக கூறப்படுகிறது.

அதன்படி, தற்போது மமீதா பாஜூ இந்தப் படத்தில் இணைந்துள்ளதாகவும் தகவல் வெளியாகியுள்ளது. கடந்த ஆண்டு வெளியான ’பிரேமலு’ என்ற மலையாள திரைப்படத்தில் நடித்ததன் மூலம் தென்னிந்தியா முழுவதும் பிரபலமான மமீதா பாஜூ, அதன் பின்னர் ஜிவி பிரகாஷ் நடித்த ‘ரெபல்’ திரைப்படத்திலும் நடித்தார். தற்போது, விஜய் நடித்து வரும் ‘ஜனநாயகன்’ மற்றும் விஷ்ணு விஷால் நடித்து வரும் ’இரண்டு வானம்’ உள்ளிட்ட படங்களில் நடித்துக் கொண்டிருக்கிறார்.

தனுஷின் படத்தில் நடிக்க ஒப்பந்தம் செய்யப்பட்டதையடுத்து, தனுஷ் ரசிகர்கள் மமீதா பாஜூவுக்கு வாழ்த்துக்களை தெரிவித்து வருகின்றனர்.