தளபதி விஜய் நடித்த ‘பிகில்’ திரைப்படம் பத்தே நாட்களில் ரூ.200 கோடிக்கும் மேல் வசூல் செய்து சாதனை செய்து வரும் நிலையில் அவர் நடித்து வரும் அடுத்த படமான ‘தளபதி 64’ படத்தின் படப்பிடிப்பு தற்போது விறுவிறுப்பாக நடைபெற்று வருகிறது

இந்த நிலையில் இந்த படத்தின் முதல்கட்ட படப்பிடிப்பு சமீபத்தில் சென்னையில் முடிவடைந்து தற்போது டெல்லியில் அடுத்தகட்ட படப்பிடிப்பு நடைபெற்று வருகிறது. ஆனால் டெல்லியில் கடந்த சில நாட்களாக காற்று மாசு, பெரும் பிரச்சனையாக இருப்பதால் தளபதி 64 படத்தின் படப்பிடிப்பிற்கும் சிக்கல் ஏற்பட்டுள்ளதாக கூறப்படுகிறது

டெல்லியில் தற்போது நிலவி வரும் காற்றுமாசு காரணமாக படப்பிடிப்பு நடைபெறுவதில் தொய்வு ஏற்பட்டுள்ளதாகவும், டெல்லியில் காணப்படும் மூடுபனியால், குறைவான நேரம் மட்டும் விஜய் சம்பந்தப்பட்ட காட்சிகள் படமாக்கப்பட்டு வருவதாகவும் கூறப்படுகிறது.

லோகேஷ் கனகராஜ் இயக்கத்தில் அனிருத் இசையில் உருவாகி வரும் இந்த படத்தில் விஜய்க்கு ஜோடியாக மாளவிகா மேனன் நடித்து வருகிறார். மேலும் இந்த படத்தில் சாந்தனு, அந்தோணி வர்கீஸ், ஆண்ட்ரியா, பிரிகிதா உள்பட பலர் நடித்து வருகின்றனர். இந்த படம் அடுத்த ஆண்டு ஏப்ரலில் வெளியாகும் என எதிர்பார்க்கப்படுகிறது