மோகன்லால் நடித்த ’எம்புரான்’ திரைப்படம் வரும் 27ஆம் தேதி வெளியாக இருக்கிறது. இந்தத் திரைப்படத்திற்கான எதிர்பார்ப்பு அதிகமாக இருக்கும் நிலையில், அதே நாளில் பெங்களூரை சேர்ந்த தனியார் கல்லூரி ஒன்றில் விடுமுறை அறிவிக்கப்பட்டுள்ளதாக தகவல் வெளியாகியுள்ளது.

அதுமட்டுமின்றி கல்லூரியின் மாணவர்களுக்கு திரைப்பட டிக்கெட்டுகளும் முன்பதிவு செய்து வழங்கப்பட்டுள்ளதாக கூறப்படுகிறது. இந்த தகவல் பலரிடமும் ஆச்சரியத்தை ஏற்படுத்தியுள்ளது.

மோகன்லால் நடிப்பில், பிரித்விராஜ் இயக்கத்தில் உருவாகியுள்ள ’எம்புரான்’ திரைப்படம் மிகப்பெரிய எதிர்பார்ப்பை உருவாக்கியுள்ளது. முன்பதிவுகளிலும் சாதனை படைத்துள்ள இப்படம், ரசிகர்கள் மத்தியில் பெரிய வரவேற்பை பெறும் என எதிர்பார்க்கப்படுகிறது.

இந்த நிலையில், பெங்களூரில் செயல்பட்டு வரும் அந்த தனியார் கல்லூரியின் முதல்வர், மோகன்லாலின் தீவிர ரசிகர் என்பதால், மார்ச் 27ஆம் தேதி கல்லூரிக்கு விடுமுறை அளித்துள்ளார். மேலும், பெங்களூரு ராஜராஜேஸ்வரி நகரில் உள்ள ஒரு திரையரங்கில், அதே நாளில் காலை 7 மணிக்கான காட்சிக்கான டிக்கெட்டுகளை மாணவர்களுக்காக முன்பதிவு செய்து வழங்கியுள்ளதாக தகவல் வெளியாகியுள்ளது.

பொதுவாக, ரஜினிகாந்த், விஜய் போன்ற முன்னணி நடிகர்களின் படங்கள் வெளியாகும் போது சில ஐடி நிறுவனங்கள் விடுமுறை அளித்து, பணியாளர்களுக்கு டிக்கெட்டுகள் வழங்கும் சம்பவங்கள் நடந்துள்ளன. ஆனால், இப்போது ஒரு தனியார் கல்லூரி மோகன்லால் பட ரிலீஸ் தினத்தில் விடுமுறை என்ற முடிவு எடுத்திருப்பது ரசிகர்கள் மத்தியில் பெரும் ஆச்சரியத்தை ஏற்படுத்தியுள்ளது.