పవర్‌స్టార్ పవన్‌కల్యాణ్‌ హీరోగా నటించిన ‘గబ్బర్‌సింగ్‌’లో నటుడు ఆంజనేయులు తన నటనతో అందర్నీ మెప్పించిన విషయం అందరికీ గుర్తుండే ఉంటుంది. సోమవారం నాడు ఆంజనేయులు రోడ్డు ప్రమాదంలో గాయపడ్డారు. ప్రస్తుతం ఆయన పరిస్థితి నిలకడగా ఉంది. వివరాల్లోకెళితే.. హైదరాబాద్‌లోని జూబ్లీహిల్స్‌ చెక్‌పోస్టు మీదుగా ఇంటికి వస్తుండగా ఓ గుర్తుతెలియని వ్యక్తి కారుతో.. ఆంజనేయులు బైక్‌ను ఢీ కొన్నాడు.

ఈ ప్రమాదంలో ఆయనకు, ఆయన భార్యకు గాయాలయ్యాయి. ఆంజనేయులకు కాళ్లు, చేతులకు గాయాలయ్యాయి. ఆస్పత్రికి వెళ్లి వైద్యం తీసుకున్న భార్యాభర్తలు అనంతరం జూబ్లిహిల్స్ పోలీసులకు ఫిర్యాదు చేశారు. ఫిర్యాదు స్వీకరించిన పోలీసులు కేసు నమోదు చేసుకుని దర్యాప్తు చేస్తున్నారు. సీసీటీవీ ఫుటేజీ ఆధారంగా నిందితులను పట్టుకునేందుకు పోలీసులు ప్రయత్నాలు చేస్తున్నారు. కాగా ఈ ఘటనకు సంబంధించి మరింత సమాచారం తెలియాల్సి ఉంది.